මහා වැහි කෝඩයක් තුරල්ව ගිය පසු එළැඹෙන ගුප්ත කාලයක් මෙන් කවුරු කවුරුත් තුෂ්නිම්භූතව බලා සිටින්නාක් මෙනි. දේශපාලනය කරද්දී එහෙම වැහි කෝඩ එනවාය. ඒ වගේම ඒවා තුරල් වී යනවාය.

පසුගිය දවස්වල ගත වුණේ එවැනි ගුප්ත කාලයක්ය. කවුරුත් ඒ කාලය තුළ ජීවත් වුණා වුව ඒ වෙච්ච දේ හරිහැටි වටහා ගත්තේ නැතුවා වගේය.

“මහින්ද මහත්තයා මෛත්‍රිගේ ලණුව කාලා අගමැතිකම ගත්තා. ඒ නිසා උගුලක අහුවුණා. තිබුණු ජන ප්‍රසාදය බැස්සා. අනවශ්‍ය දෙයක් කර ගත්තේ. ඒකෙන් වුණේ පොහොට්ටුවේ රැස් වළල්ලත් බැහැලා ගිය එකයි. අපරාදේ වෙච්ච දේ. ඔය අගමැතිකම නොගෙන හිටිය නම් යස අගේට ආණ්ඩුව හිතන්නැති වෙලාවක පෙරළලා මැතිවරණයකට ගිහින් බලයත් අරන් ආණ්ඩුවත් පිහිටුවන්න තිබුණා. අපරාදේ.”

එහෙම කතා වෙන ශ්‍රී ලංකාකාරයෝද පොහොට්ටුකාරයෝද විශේෂයෙන් යූ.එන්.පී.කාරයෝද සිටිති. මේ කවුරු කවුරුත් මහින්ද කරපු දේ ගැන තවම හරියට තේරුම් අරන් නෑ කියා හිතෙන්නේ ඔන්න ඔය වෙලාවටය. ඒ නිසා කාට කාටත් තේරෙන්නත් එක්ක ඇත්තටම මහින්දට වැරදුණා දැයි සොයා බලන්නට වටින්නේය. යහපාලන ආණ්ඩුව යන්න බෝඩ් ලෑල්ලකට සීමා වෙමින් රනිලුත් මෛත්‍රිත් දෙන්නට දෙන්නා විරසකයක නම් උන්නු බව නොරහසකි. මේ විරසකයේ කූටප්‍රාප්ති අවස්ථා කිහිපයක්ම ඇති වූ නමුත් කොයියම් ආකාරයකින් ඒවා සමනය වී රනිල් මෛත්‍රි ආණ්ඩු පූට්ටුව දිගටම ගියේය. ඒ අතර මෛත්‍රිත් හීනියට වචන දෙක තුනක් මුදා හැර නොරොක් වීමේ අංග ලක්‍ෂණ මතු කරමින් උන්නේය. ඇතුළත ගිනි ගන්නා ආකාරයත් එය පිටතට දැනෙන ආකාරයත් මහින්ද බලා උන්නේ නොඉවසිල්ලෙනි. සීරුමාරුවෙනි.

කොහොම නමුත් මෛත්‍රි සහ මහින්ද අතර තිබුණු නොරොක් වීම තුරන් වී එය යම් සම්මුතියක් වෙත ළඟා කරවන්නට අදිසි මෙහෙයුමක් දියත් වුණේය. ඒ කපුකම කළ කපු රාලලාගේ වැඩේ හරි ගිය අතර මහින්දත් – මෛත්‍රිත් අතර අදහස් හුවමාරු වන්නට විය. මේවා කොහොම කෙරුණාද යන්න යූ.එන්.පී.යට සිතා ගන්න බැරි විදියට වැඩ ටික කෙරුණේය.

තීරණාත්මක කාලය එළැඹුණේ රනිල්ට එරෙහිව විශ්වාසභංගයක් ගෙන ඒමත් සමඟය. විශ්වාසභංගය දා මෙහෙයුමෙන් අවසන් මොහොතේ හෝ රනිල් එය ගොඩ දාගන්නා බව මහින්ද දැන උන්නේය. ඒ තරමටම එය තියුණු එකක් වුණේය. මේ සිදුවීම දේශපාලනමය වශයෙන් බෝම්බයක් පුපුරා යන්නට කරුණු කාරණා කිහිපයක්ම සකස් කර දී තිබුණේය. එවිට ඒකාබද්ධයේ මන්ත්‍රිවරු සිටියේ 54කි.

අන්තිමට සිදුවුණේ රනිල් නොසිතූ දෙයකි. එනම් ශ්‍රීලනිපයේ බෑයක් එනම් 16ක් ගැලවී මෛත්‍රිගේ ද නොනිල ආශීර්වාදය මැද විපක්‍ෂයට යෑමය. ඒ අඩව්වෙන් පසු ඒකාබද්ධය තව තවත් ශක්තිමත් වූ අතර දයාසිරි පමණක් ආපිට හැරී ගියේය. එහෙත් ශ්‍රීලනිප 15 සහ ඒකාබද්ධයේ 54 එකතු වීමෙන් විපක්‍ෂයේ ඒකාබද්ධ බළඇණිය ජීවයක් ලැබී එහි පිරිස 69ක් දක්වා ඉහළ ගියේය.

රනිල් – මෛත්‍රි විරසකය ඔඩුදුවා ගොස් තිබුණු හොඳම මොහොතක එක්සත් ජනතා නිදහස් සන්ධානය සම්මුතිවාදී ආණ්ඩුවෙන් ඉවත් වන බව ප්‍රකාශ කිරීමත් සමඟම දෙබරයට ගල් ගැසුවාක් මෙන් විය. යහපාලන සම්මුතිවාදී ආණ්ඩුව දෙදරා ගිහින් මහින්ද අගමැති වූ අතර මෛත්‍රි ආණ්ඩුවේ නායකයා විය. එය අර්බුදකාරී කාලවකවානුවක් වූ අතර ඒ මැද තව තවත් මෛත්‍රි හා මහින්ද බලවේග වශයෙන් ඒකාබද්ධ විය. ළං විය. එවිට එක්සත් ජනතා නිදහස් සන්ධානය වශයෙන් පාර්ලිමේන්තුව තුළ සිටි මුළු පිරිසම 96ක් වීමත් සිදු වුණේය.

අගමැති පදවිය මහින්ද භාර ගත්තේ එය හෙළ වෙන දතක් බව දැන දැනම වුවද කිසිවකුත් බලාපොරොත්තු නොවූ ප්‍රතිඵල ද ලැබෙමින් තිබිණි. එක්සත් ජාතික පෙරමුණේ ගාල් වූ මන්ත්‍රිවරුන් වූ ආනන්ද අලුත්ගමගේ, විජයදාස රාජපක්‍ෂ, දුනේෂ් ගන්කන්ද, එස්.බී. නාවින්න, අශෝක ප්‍රියන්ත මෙන්ම කිසිවකුත් බලාපොරොත්තු නොවූ ආකාරයෙන් ටී.එන්.ඒ. මන්ත්‍රිවරයකු වූ එස්.වියලේද්‍රන් මහින්දගේ දෑත් ශක්තිමත් කරන්නට ඔහු හා එක් වුණේය. ඒ අනුව රාජ්‍ය නායකයා, ජනාධිපතිවරයා, රනිල් ප්‍රසිද්ධියේම පිළිකෙව් කරමින් මහින්දගේ බලවේගයට එකතු වීමත් යූ.එන්.පී.යේ පවුරු පදනම් බිඳ දමන්නටත් හේතු වුණේය. ඒ අනුව එක්සත් ජනතා නිදහස් සන්ධානයට තවත් අමතර ශක්තියක් ද ලැබී තිබුණේය. ඒ අනුව පාර්ලිමේන්තුව තුළ මෛත්‍රි හා මහින්ද ඇතුළු බලවේගයට එක්සත් ජනතා නිදහස් සන්ධානයට හිමි මන්ත්‍රිවරු 96 දෙනාට අමතරව එකතු වූ එ.ජා.ප. – ටී.එන්.ඒ. මන්ත්‍රිවරු 6ත් සමඟ ගණන 102ක් වුණේය. ඒ ස්වාධීනව ඉන්නා අතුරලියේ රතන හිමියන්ට අමතරවය.

නැවත යූ.එන්.පී.ය ආණ්ඩුව පිහිටුවීමත් සමඟ විජිතමුනි ද සොයිසා, ඉන්දික බණ්ඩාරනායක, ලක්‍ෂ්මන් සෙනෙවිරත්න, ඒ.එච්.එම්. පවුසි, පියසේන ගමගේ හා මනුෂ නානායක්කාර ඒ පැත්තට එකතු වුණත් ප්‍රධාන විපක්‍ෂයේ සංයුතිය 96ක්ව දැන් මහින්ද සමඟ සිටියි.

එතැනින් යූ.එන්.පී.යේ කොන්ද කැඩුණු අතර රනිල්ට තමන් වටා සිටි පිරිස රැක ගන්නට හතර අතේ වඳින්නට සිදුවිය. වසන්ත සේනානායක හා වඩිවේල් සුරේෂ් ආවා ගියෝ ගානට වැටුණු අතර එයින් යූ.එන්.පී.ය තුළ තිබූ අර්බුදයද කැපී පෙනුණේය. එය එළිපිට පෙනෙන්නට ඉඩ සැලසුණේය. රනිල් කොයි තරම් කලබලයට පත් වුණා ද කියතොත් බලන බලන අත සිටින තමන්ගේම මිනිසුන් සියලු දෙනාම සැක කරන තරමට මේ දේශපාලන බෝම්බය මහින්ද-මෛත්‍රිගේ සහායෙන් එ.ජා.ප.ය තුළ පුපුරුවා හැර තිබුණේය.

මහින්ද අගමැති වීමත් එ.ජා.ප.ය අර්බුදයකට යැවීමත් යන කාරණා අතර මහින්ද කල්පනා කළේ එතෙක් එක්සත් ජාතික පෙරමුණු ආණ්ඩුව විසින් ලබා නොදුන් සහන සියල්ල ලබා දෙමින් තව තවත් එ.ජා.ප.ය. ජනතාව අතර අර්බුදයකට යැවීමටය. ඒ අනුව මහින්ද තෙල් මිල දෙවතාවක් අඩු කර ජනතාවට එක පිට එක සහන දෙමින් රනිල් හා එ.ජා.ප.ය දැඩි අසීරුතාවකට පත් කළේය. එයින් ජනතාවට ඒත්තු ගන්වන්නට සැලැස්සුවේ…
“සහන දෙන්න පුළුවන්කම තිබිලත් රනිල්ලා සහන දීලා නෑනේ” යන්නය.

මෙහි තවත් පැත්තක් ඇත. ඒවා කවුරුත් මතු කරන්නේ ද නැත. යූ.එන්.පී.යේ තුන් දෙනකු ගැලවීමත්, ටී.එන්.ඒ. හා යූ.එන්.පී.ය. දෙකක් නොව එකක් ලෙස කටයුතු කරන හිත මිතුරු බලවේග බවත් රටට දැනෙන්නට ඉඩ හසර සැපයුවේ මහින්දය.

මේ ප්‍රවණතා ඇති කරමින් මහින්ද කළ පළමු කාරිය නම් ආණ්ඩුවක් අටවා ගත්තත් එක්සත් ජාතික පෙරමුණට තුනෙන් දෙකේ බහුතර බලයක් නැති කිරීමය. දැන් තිබෙන්නේ යාන්තමින් ජාම බේරා ගන්නට සිදුවන තත්ත්වයකි. ඒ අනුව රනිල්ට මින් මතු හැම තීරණාත්මක මොහොතකම ඡන්දයකට යන්න වෙන්නේ බයෙන් සැකයෙන්ය. අවිනිශ්චිත වාතාවරණයක් මැදය.

මේ සිදුවීම් සියල්ල එකට පෙළ ගැස්වූ විට රනිල්ට එරෙහිව ගෙනා විශ්වාසභංගයෙන් ආණ්ඩුවේ කඩා වැටීම ඇරඹිණි. ශ්‍රීලනිපයේ 16 දෙනෙක් මහින්දට එකතු වූයේ ඒ අනුවය. ඔක්තෝබර් 26 වැනිදා අගමැතිකම භාර ගන්නට මහින්ද ගත් තීරණය නිසා මෛත්‍රි – රනිල් දේශපාලන දීගය සමාප්ත විය.

ඒ නිසා සම්මුතිවාදී ආණ්ඩුවද බිඳ වැටිණි. ඊළඟට එජාපයේ පමණක් නොව දෙමළ සන්ධානයද දෙකඩ විය. ඒ මදිවාට සම්පන්දන්ගේ විපක්‍ෂ නායකකමද අහිමි විය. අධිකරණ තීන්දුවකින් යළි එජාපයට බලය හිමිවුවද ඇමැතිකම් බෙදාගත නොහැකිව ආණ්ඩුව මේ වන විට පඹගාලක පැටලී ඇත. ආණ්ඩුවට තුනෙන් දෙකේ බලයද අහිමි වී ඇත.

ජවිපෙට විපක්‍ෂයේ ප්‍රධාන සංවිධායක ධුරය ද අහිමි විය. කෙටි කලකට හෝ ආණ්ඩුව භාරගත් මහින්ද තෙල් මිල හා තවත් භාණ්ඩ ගණනාවක මිල අඩු කරමින් දුන් සහන මල්ල නිසා වත්මන් ආණ්ඩුවද සහන නොදී බැරි තැනකට පත් කර ඇත. ඒ අනුව බලන විට වැරදී ඇත්තේ කාටද?

ඒ අනුව ඉදිරියේදී ජනතාව පෙළ ගස්වන මැතිවරණයක් යනුවෙන් මහින්ද දැනටමත් පෙළ ගස්වා තිබෙන බලවේගය සුළුපටු එකක් නොවේ. ජනතාවගේ කැමැත්ත කාට දැයි දන්නා මහින්ද තමන්ගේ වසර 49ක පරිණත දේශපාලනයේ කවුරුත් නොහිතන ජයග්‍රහණ ලබාගෙන තිබෙන්නේ සිය දිගුකාලීන අත්දැකීම් ගුරුකොට ගනිමින්ය. ඔහු ඒ පන්නරය හීන් සීරුවේ ජනතාව අතරට ගෙන යමින් ඉදිරි ජයග්‍රහණ ස¼දහා පෙළ ගස්වා තිබෙන්නේය. ඒ අනුව හැබෑවටම මහින්ද පැරදුණාද දිනුවාද කියලා කාට කාටත් තේරුම් යන්නේය.

මාගම්පුත්‍ර